Bönnum nagladekkin.

Það hefur lengi verið vitað að naglar í dekkjum spæna upp malbik og önnur varanleg slitefni á götum og vegum. Svifmengun eykst og kostnaður við viðhald einnig.Þá geta nagladekkin veitt falska öryggistilfinningu og í raun er flest neikvætt við að aka á negldum dekkjum. Nú eru á markaði fjölmargar tegundir af frábærum dekkjum sem hægt er að aka á allt árið um kring án nagla. Í meira en áratug hef ég ekið mínum bílum naglalaust án nokkurra vandræða. Ég bý að vísu hér sunnanlands og vetur hafa verið fremur snjóléttir. Þessi vetur er þó undantekning og segja má að það hafi verið snjór hér meira og minna síðan í lok nóvember. Allt hefur gengið að óskum án naglanna. Ég er viss um að það væri mikið framfaraskref að banna nagladekkin. Það mætti undanskilja lögregluna, sjúkraflutningana og slökkviliðið ef ástæða þykir til þess. Verum umhverfisvæn og spörum í leiðinni.

Nagladekk ógna heilsunni

Athugasemdir

[Óskar Helgi Helgason (IP-tala skráð) 2.4.2012 kl. 15:48]

Sæll; Sigurður !

Þér; að segja, hefi ég nú talið æskilegra, að vera á nagladekkjunum, á leiðum eins og : Bröttubrekku - Fróðár- og Holtavörðuheiðum, þegar ég hefi átt leið, um þær slóðir, ekki síður, en á Hellisheiði syðri að Vetraralagi, oftlega.

Stundum; þegar bratti er mikill, og ísing eða krapi eru óhjákvæmilegar aðstæð ur, er ekki hægt annað, en þakka neglingunni, ágæta leiðarenda, svo sem.

Við; sem eldri erum, og reyndari, þekkjum kenjar íslenzkrar veðráttu - og hversu margbreytileg hún getur verið, á kortéra - eða klukkutíma fresti, jafnvel. 

Síðan; er ekki verra, að vera með tæplega 1/2 fjórða áratugar að baki, í akstri að reynslu, stóráfallalaust, eftir góða kennzlu öðlingsins Þorfinns Tómassonar heitins á sínum tíma, þar; að auki.

Jú; sem betur fer, eru margir Vetrardaga með þeim hætti, að negling sé óþörf, en gott er, að geta treyst á þá, þegar svo ber undir, síðuhafi góður.

Með beztu kveðjum; austur yfir fljót - úr Hveragerðis og Kotstrandar skírum /   

[Gunnar Heiðarsson, 2.4.2012 kl. 17:19]

Þessi áróður gegn nagladekkjum er orðinn þjóðhagslega stór hættulegur. Fólki er talin trú um að öryggi þess sé tryggt án nagla, sveitafélög segjast halda öllum aðalleiðum opnum og söltuðum, svo enginn þurfi að aka á nöglum. Þetta býður beinlínis heim hættunni og veturinn í vetur sannar það hressilega. Tjón vegna árekstra hefur sjaldan eða aldrei verið meira, sérstaklega snemma á morgnanna, þar sem sveitafélögin ætla að spara fé með því að senda tækin sín seinna út á göturnar. Þá þarf fólk einnig að komast út úr óhreinsuðum íbúðagötum út á hina "greiðfæru" aðalleiðir.

Það eru ekki naglarnir sem skemma göturnar, heldur saltið. Það leysir upp tjöruna í slitlaginu og þá eiga nagladekkin sem og önnur dekk auðvelt með að spæna það upp. Þetta hefur verið marg rannsakað og hafa t.d.  Svíar gert margar tilraunir á þessu sviði. Niðurstaðan er alltaf sú sama; saltið er skaðvaldurinn, ekki nagladekkin.

Nær væri að banna salt á göturnar og lögleiða nagladekkin. Þannig væri bæði verið að auka öryggið og spara viðhald gatna!

Þá er ótalinn sá kostnaður og það tjón sem bíleigendur verða fyrir vegna þessa gengdarlausa saltausturs. Rið og tæring leggur margan borgarbílinn langt um aldur fram. Kostnaður vegna þess fyrir þjóðarbúið hefur aldre verið opinberaður þó ljóst sé að fyrir löngu sé búið að reikna hann út. Ef ekki eru fræðimenn og pólitíkusar ekki að standa sína plikt, þetta eru upplýsingar sem þeir ættu að vera búnir að kanna.

Ekki má svo gleyma þeim sem verða að ferðast um utan stór Reykjavíkursvæðisins. Víðast hvar utan þess er ekki verið að sóa saltinu og malbikinu, heldur sýna ökumenn þá forsjálni að aka bara á nagladekkjum. Þannig spara þeir sínu sveitafélagi mikla fjármuni og auka eigið öryggi til muna.

[Sigurður Sveinsson, 3.4.2012 kl. 04:23]

Það á að banna nagladekkin og saltið líka. Saltausturinn er yfirgengilega vitlaus og eyðileggur malbikið eins og naglarnir, auk þess að skemma farartækin. Það er engin forsjálni að aka á nagladekkjum. Það er margsannað að aðrar lausnir eru miklu betri eins t.d. harðkornadekkin. Mörg óhöpp verða vegna þess að naglarnir virka eins og skautar við vissar aðstæður. Það prófaði ég sjálfur fyrir hálfum öðrum áratug. Við skulum bara vera ósammála um nagladekkin. Þið akið á ykkar nagladekkjum meðan þau eru leyfð en það flökrar ekki að mér.

[Gunnar Magnússon (IP-tala skráð) 4.4.2012 kl. 00:33]

Einu sinni var ég svarinn andstæðingur saltsins og kenndi saltinu um alla tjöruna sem allt er lifandi að drepa á veturna hérna. Svo fór ég til BNA og sótti bíl sem ég keypti þar og ók honum í þrjá daga til austurstrandarinnar til að koma honum í skip þar. síðustu dagleiðina upplifði ég þann mesta saltaustur sem ég hef nokkurn tíma kynnst. Græni bíllinn var orðinn hvítur af salti. þegar búið var að skola saltið af bílnum þá duttu nú allar dauðar lýs úr höfði mér. Það var ekki tjöruarða á bílnum. Þá gerði ég mér grein fyrir því að það er ekki saltið sem leysir upp tjöruna heldur naglarnir hamra tjöruna upp úr malbikinu.

Nafni minn Heiðarsson grípur til þess ráðs að minnast á margar rannsóknir en vísar ekki í neina, enda veit hann ekki um neina rannsókn sem hefur sýnt fram á að saltið sé þessi tjöruuppleysir.

Nú má ekki skilja mig sem svo að ég sé að mæla því mót að götur séu saltaðar. Ó, nei. Það á að hætta öllum saltaustri og sekta vanbúna bílaeigendur sem sem komast hvorki lönd né strönd nema saltdreyfarinn aki á undan þeim.

Og burt með nagladekkin, því þau eru þess valdandi að maður getur ekki einu sinni ekið á góðum dekkjum í snjó án þess að renna vegna tjörudrullunnar sem naglarnir tæta upp úr götunum.

[Nonni (IP-tala skráð) 4.4.2012 kl. 01:24]

Salt getur ekki leyst upp tjöru, einföld menntaskólaefnafræði getur sýnt fram á það.

Það á að banna nagladekk nema ef vera skyldir fyrir neyðarbíla. Mín vegna má salta undir drep en helst vil ég hafa það sem minnst og þá sanda frekar. En ef leiðir eins og Brattabrekka, Fróðár- og Holtavörðuheiði og Hellisheiði vestari eru þaktar ís eða krapa svo skapar hættu á einfaldlega að beita akstursbanni. Þeir sem aka inn á lokaða leið gera það á eigin ábyrgð og eru ótryggðir. Aðstæður breytast fljótt og leiðin verður fær eða hún er söltuð. Þetta er nákvæmlega aðferðin sem notuð var lengi vel á varnarsvæðinu við Keflavíkurflugvöll og gafst vel.

Ég hef nokkra reynslu af akstri í dreifbýli á naglalausum dekkjum og ég ek einfaldlega hægar ef það er hált. Nagladekk eru tímaskekkja.