Magnaður meirihluti.

Eins og mörgum er kunnugt er heitt í kolunum hér á Selfossi vegna nýrrar skipulagstillögu um miðbæinn. Ég held nú samt að við ættum að kæla okkur niður. Það eru 5 vitringar í meirihluta bæjarstjórnarinnar. Og það virðist fátt sem þeim er ómögulegt. Þeir munu stjórna rennsli Ölfusár svo hún flæði ekki inní nýju bílakjallarana. Skuggavarp af háum byggingum verður heldur ekki vandamál því þeir munu láta sólina skína lóðrétt ofan á miðbæinn. Vindsveipir um 33 metra turn við brúarsporðinn verða stöðvaðir með augnaráðinu einu. Og hið virka jarðskjálftasvæði hér mun einfaldlega halda sér í skefjum fyrir bænarhita þessara snillinga. Við skulum hætta andófinu. Hinn magnaði meirihluti mun sjá um oss öll.