Rífandi gangur.

Það er nú ekki aldeilis ónýtt að hafa vökult auga réttvísinnar í lagi hér á landi. Önnur ákæran á þessa voðalegu glæpamenn í burðarliðnum. Valtýr var eitthvað utan við sig í janúar. Einhvernveginn finnst mér að það hafi gerst áður. Lára verður örugglega flott á þessu og kemur þessu fólki undir lás og slá á mettíma. Nú ætla ég ekki að réttlæta gerðir þessa fólks. Talað er um húsbrot, brot á alsherjarreglu, árás á Alþingi og svona hitt og annað smálegt í leiðinni. En er það mikil þjóðhagsleg nauðsyn að koma þessu fólki í rasphúsið? Eru þetta einu glæpamennirnir sem ganga lausir í þessu þjóðfélagi? Það læðast nú að mér efasemdir um það. Í sannleika sagt kemur þetta ekkert á óvart. Hér er enginn áhugi yfirvalda á koma lögum yfir stórglæpamenn. Í þeim efnum er allt á hraða snigilsins. Og mál fyrnast hvert af öðru. Það verður líka að hafa samræmi í hlutunum. Hér er talið sjálfsagt að afskrifa skuldir glæpamanna á meðan ekki má leiðrétta neitt hjá hinum réttlausa alþýðumanni. Vinstra fólki hefur orðið tíðrætt um frjálshyggjuna og afrek íhalds og framsóknar í hálfan annan áratug. En er þetta sama fólk ánægt með núverandi ríkisstjórn? Ríkisstjórn sem ekki virðist geta tekið af skynsemi á nokkrum sköpuðum hlut. Gerir lítið annað en tóma tjöru og sukkið og spillingin fær að þrífast áfram. Dæmin blasa allsstaðar við og bókstaflega æpa á breytingar. Hið hrokafulla lið í fílabeinsturninum sér ekkert, heyrir enn minna og ætti að segja af sér strax.

Ákæra útgefin á ný í vikunni

Athugasemdir

[Valli (IP-tala skráð) 24.2.2010 kl. 08:55]

Er þetta mál ekki aðeins einfaldara í rannsókn en málin tengd hruninu? Mikið ofboðslega eru þetta orðin þreytt rök. Það má orðið ekki birtast frétt um að glæpamenn séu ákærðir eða dæmdir án þess að lítið sé gert úr því. Ef menn hafa ekki vit til að greina á milli þessara mála eiga menn að spara stóru orðin.

[Pjetur Hafstein Lárusson, 25.2.2010 kl. 00:17]

Vissulega er illt til þess að vita, að starfsfriði Alþingis skuli hafa verið raskað.  En verður ekki að skoða þennan atburð í ljósi aðstæðna í þjóðfélaginu? Sé það gert, er ég ekki viss um, að hægt sé að dæma þetta fólk, a.m.k. ekki í rasphúsvist.