Vinstri stjórn ?

Sumir hafa kallað þessa ríkisstjórn fyrstu tæru vinstristjórnina. Ekkert er þó fjær sanni. SF hefur aldrei verið vinstriflokkur og nokkrir hrunráðherrar úr síðustu ríkisstjórn SF og íhaldsins eru þarna innanborðs. Reyndar hefur SF aldrei verið annað en hugsjónalítil moðsuða um völd og bitlinga.Eina hugsjón flokksins er aðildin að evrópubandalaginu. Össur hefur reyndar líka viðrað hugmyndir um markaðsvæðingu heilbrigðiskerfisins, sem ekki er nú beinlínis vinstripólitík. Hvað sem annars má segja um störf Jóns Bjarnasonar sem ráðherra er þó alveg ljóst að hann hefur verið trúr yfirlýstri stefnu VG varðandi aðildina að ESB og ekki verið hrifin af brölti SF í þeim efnum. Ég held að það þurfi ekki sérstakt pólitískt nef til að sjá að litlu einræðisherrarnir, Jóhanna og Steingrímur, hafa nú þegar tryggt sér stuðning eða hlutleysi nokkurrra stjórnarandstöðuþingmanna. Vitað er um afstöðu Sifjar og Guðmundar Steingrímssonar í ESB deilunni. Þó lítið sé gefið upp um viðræður stjórnarinnar við Hreyfinguna er þó líklegt að henni hafið verið lofað einhverju fyrir hlutleysi. Sem gömlum stuðningsmanni Steingríms og VG rennur manni til rifja hvernig komið er fyrir honum. Þegar ríkisstjórn þessi hefur lokið ferli sínum mun ekki steinn standa yfir steini í flokki þessa stofnanda hans. Minnisvarði formannsins verður ekki merkilegri en rústirnar af þessum fyrrum hugsjónaflokki margra vinstrisinnaðra kjósenda hans. Það er einkennilegt atferli sumra dýrategunda að útrýma sjálfum sér. En það er heldur ekki eftirsjá af þeim öllum.

 

 

 


mbl.is Látinn víkja vegna ESB
Tilkynna um óviðeigandi tengingu við frétt

Frábærar breytingar.

Ég heyrði í kvöld að til stæði að senda Jóhönnu og Steingrím í æfilangt frí frá pólitíkinni. Það væru bestu tíðindi í stjórnmálasögunni ef satt væri. Steingrímur hefur sjálfur sagt að ekkert sæti í þessari "norrænu velferðarstjórn" sé frátekið, og hlýtur líka að verða hvíldinni feginn.
mbl.is Breytingar á ríkisstjórninni ræddar
Tilkynna um óviðeigandi tengingu við frétt

Búrtíkurnar gjamma.

Álfheiður er meðlimur í innstu náhirð fjármálaráðherrans. Það er stundum erfitt að viðurkenna mistök og sannleikurinn bitur og rammur. ÓRG sparaði þjóðinni marga milljónatugi með því að koma í veg fyrir að icesavelögin yrðu virk. Þjóðin felldi lögin á laugardegi og milljarðarnar 25 sem Steingrímur ætlaði að borga í vexti af "skuldinni" á mánudegi fengu að vera kyrrir í ríkissjóði. Það er alveg sama hve Steingrímur og skoðanabræður hans reyna til að falsa söguna um icesavedeiluna. Þeim mun ekki takast það. Málið er nú í réttum farvegi og Ólafur Ragnar réttur maður á réttum stað. Meðan núverandi ríkisstjórn situr, sem deilir og drottnar, hunsar vilja meirihluta þjóðarinnar og fer sínu fram hverju sem tautar og raular, er nauðsynlegt að hafa góðan öryggisventil á Bessastöðum. Þessai brandari Álfheiðar er alveg misheppnaður. Hins vegar myndi ég fagna því ef Ólafur Ragnar gæfi enn kost á sér til framboðs til forseta á næsta ári.
mbl.is Vill forsetann í framboð
Tilkynna um óviðeigandi tengingu við frétt

Ósköp leiðist mér ykkar grenj..

ýmist í dúr eða moll. Sagði skáldið. Það er alveg yfirgengilegt hvernig samtök og einstaklingar í ferðaþjónustu geta látið. Halda mætti að vegagerðin og ríkisstjórnin hefðu komið þessu hlaupi af stað. Það mætti líka halda að landið riðaði til falls vegna mannvonsku vegamálastjóra og samgönguráðherrans. Bara 14 manns í mat í stað 130. Voðinn blasir við. Kannski eru ekki allir læknaðir af 2007 veikinni. Frekjunni og græðginni. Ég mun sneiða vandlega hjá Hótel Höfðabrekku ef ég á leið þar um. Djöfulgangurinn í þessu fólki verður því til ævarandi skammar. Vegagerðin og ríkisstjórnin stjórna ekki náttúruöflunum hér eins og halda mætti af viðbrögðunum.
mbl.is „Finnst þetta með ólíkindum“
Tilkynna um óviðeigandi tengingu við frétt

Byssubófi ?

Páll Reynisson er prýðisnáungi. Það er reyndar allt of langt síðan ég drakk með honum gíraffakaffi síðast. Það er auðvitað rétt að það fer ekki saman að drekka áfengi og að leika sér að skotvopnum. En sem betur fer gerðist ekki neitt alvarlegt og ekkert bendir til þess að Páli sé ekki treystandi fyrir byssusafni sínu framvegis. Það er reynt að gera úlfalda úr mýflugu. Kannski þarf háyfirvaldið hér á Selfossi að ganga rösklega fram nú, enda reyndi það að koma þessum stórglæpamanni í gæsluvarðhald en tókst það ekki. Þetta yfirvald hefur þó ekki alltaf verið óðfúst til að hneppa glæpamenn í varðhald svo sem frægt er orðið að endemum. Veiðisafnið á Stokkseyri er merkilegt safn og við eigum Páli Reynissyni mikið að þakka fyrir að hafa komið því á laggirnar af einstakri elju og dugnaði. Þarna koma árlega þúsundir ferðamanna og byssurnar eru órjúfanlegur hluti af starfseminni. Ég sendi Páli góðar kveðjur og vona sannarlega að mál þetta fái farsælan endi. Hins vegar hef ég áhyggjur af að hinn landfrægi sýslumaður okkar sunnlendinga verði þar Þrándur í Götu.
mbl.is Fær ekki vopnin
Tilkynna um óviðeigandi tengingu við frétt

Dagdraumar.

Þeir eru undarlegir dagdraumar forsætisráðherrans. Nú á umboðslaust stjórnlagaráð að leysa vanda þjóðarinnar. Ráð, sem hefur ekki einu sinni meirihluta Alþingis að baki sér. M.a. annars skipað nokkrum alræmdum besservisserum og frekjudöllum.Þetta er eiginlega grátlegra en tárum taki. Stjórnarskrár eru ofmetnasta lagasetning sem til er. Verstu einræðisríkin hafa flottustu stjórnarskrárnar. Dettur einhverjum í hug að einhver ákvæði í stjórnarskrá komi í veg fyrir spillinguna sem gegnsýrir allt stjórnkerfið, fjármálastofnanir, embættismannakerfið og jafnvel dómstólana að auki. Sjálfur hefur þessi forsætisráðherra raðað gæðingum sínum á beit á stjórnarráðstúnið að vild sinni. Það þarf ekki að auglýsa stöður vegna þess að þessir sömu gæðingar ætla bara að bíta svolítið tímabundið. Engu sæmilega skynsömu fólki dettur í hug að stjórnarskrá Íslands hafi nokkru máli skipt þegar allt hrundi hér haustið 2008. Á vakt núverandi forsætisráðherra.Því miður hefur tekist að blekkja allt of marga til að trúa því að bruðlið með stjórnlagaþing og stjórnalagaráð muni skila einhverju jákvæðu til þjóðarinnar. Þessum fjármunum hefði verið betur varið í rækilega hreingerningu í öllu heila stjórnkerfinu. Það eru dapurlegar kenningar þessa ráðherra að afurðir stjórnlagaráðs verði uppfylling óska Jóns Sigurðssonar um nýja og betri tíma fyrir íslendinga. Við þurfum ekki nýja stjórnarskrá. Við þurfum nýja hugsun, nýtt réttlæti og nýjan kraft til að varðveita það.
mbl.is Draumur Jóns um stjórnarskrá
Tilkynna um óviðeigandi tengingu við frétt

Fjórar nýjar þyrlur.

Við íslendingar erum fáir og búum í stóru landi. Okkur er mikil nauðsyn á að eiga öflugar og góðar björgunarþyrlur. Mér hefur verið sagt að og slikt tæki kosti um 6 milljarða króna. Fjármálaráðherrann er tilbúinn með 24 milljarða til að greiða bretum og hollendingum vexti af skuld sem íslensku þjóðinni ber engin skylda til að greiða. Við skulum kaupa 4 nýjar þyrlur fyrir þessa aura.
mbl.is Lífeyrissjóðir kaupi þyrlu
Tilkynna um óviðeigandi tengingu við frétt

Náhirð Steingríms J.

Ekki veit ég hvaða fólk situr í kjördæmisráði VG í suðurkjördæmi. Hins vegar veit ég að Jón Hjartarson fyrrum bæjarfulltrúi VG í Árborg er einn af skósveinum Steingríms aðalritara og finnst ekki ólíklegt að hann sé einn aðstandenda þessarar yfirlýsingar. Atli Gíslasin situr á þingi í mínu umboði og mun gera áfram enda segist hann ætla að halda sig við stefnuskrá VG og loforð forustumannanna fyrir kosningar. Steingrímur og náhirð hans, Björn Valur, Árni Þór og fleiri eru í náðarfaðmi Samfylkingarinnar og gera flest það sem þau voru alls ekki kosin til að gera. Ég hef skömm á þessari náhirð og megi hún aldrei þrífast.
mbl.is Harma úrsögn Atla
Tilkynna um óviðeigandi tengingu við frétt

Fjölmæli.

Aldrei þessu vant get ég tekið undir með Gylfa. Það eru auðvitað voðaleg fjölmæli að vera ásakaður um að eiga Toyota jeppa. Toyota verksmiðjurnar eru sífellt að innkalla ýmsar tegundir bifreiða sinna vegna margskonar galla á þeim. Auk þess geturðu fengið miklu betri bíla fyrir miklu lægra verð. Það er einfaldlega vegið freklega að æru þessa verkalýðsrekanda. Manni getur nú sárnað!


mbl.is Íhugar að stefna DV fyrir persónuníð
Tilkynna um óviðeigandi tengingu við frétt

Þingræðið.

Steingrímur telur þingræðið heilagt. Það gera reyndar fleiri en hann. En er það svo? Alls ekki í mínum augum. Við kjósum 63 þingmenn í Alþingiskosningum. Fulltrúa til fjögurra ára sem fara með umboð þjóðarinnar til lagasetningar. En margt getur komið uppá á 4 árum. Margsinnis hefur þingið tekið afdrifaríkar ákvarðanir um málefni sem voru alls ekki á döfinni þegar kosið var. Skákað í því skjólinu að það hafi vald frá þjóðinni til að taka ákvarðanir sem þjóðin verður að una við. Þeir sem fylgdust með umræðum á þingi þann 30. desember 2009 urðu vitni að því hvernig þingræðið getur virkað. Þá var icesavesamningi þeirra Svavars og Steingríms nauðgað í gegn. Það sáu allir að Ásmundur Einar, Guðfríður Lilja og jafnvel fleiri veru með þumalskrúfur. Allir þekkja svo framhaldið. Ólafur Ragnar neitaði að skrifa undir og Steingrímur trylltist algjörlega. Þjóðin hafnaði svo lögunum með eftirminnilegum meirihluta. Lýðræðið sannaði yfirburði sína yfir þingræðið. En áráttan til að hafa vit fyrir almenningi er enn til staðar. Ef ekki verður sett inn í nýju lögin ákvæði um þjóðaratkvæðagreiðslu er nauðsynlegt að forsetinn gefi þjóðinn tækifæri á ný. Þó nýi samningurinn sé mun skárri en sá fyrri er svo mikið undir, að þjóðin verður að hafa síðasta orðið. Einkum og sérílagi á meðan menn á borð við Steingrím J. Sigfússon þrífast á Alþingi íslendinga.
mbl.is Icesave samþykkt í næstu viku
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband