Tregðulögmálið.

Það er örugglega ekki við hinn sérstaka saksóknara að sakast. Allt stjórnkerfið er gegnsýrt af fólki sem kærir sig ekkert um að allt komi uppá yfirborðið. En það er einmitt það sem verður að gerast. Réttlætiskennd okkar krefst þess. Réttlæti án hefndarþorsta.  Samt sem áður er nauðsynlegt að hinir seku taki afleiðingum gerða sinna. Þeir valsa enn um og reyna að segja okkur til vegar. Algerlega ómeðvitaðir um hvað samviska er.

Tregða við upplýsingagjöf

Þreytandi fréttir.

Mikið ofboðslega eru þessar framboðsfréttir leiðinlegar. Fólk keppist við að mæra sjálft sig uppúr skónum. Flestir er bólgnir af mannviti og hoknir af reynslu. Alveg vonlaust fyrir þjóðina að komast af án starfskrafta þessa fólks á þingi. Það hefur flest mikinn áhuga á að taka þátt í " uppbyggingunni sem framundan er". Og alveg sérstaklega vel til þess fallið.  Sumt af þessu fólki hefur reyndar tekið þátt í  hrunadansinum sem hér hefur verið stiginn með alkunnum afleiðingum.  Aðrir eru alsaklausir af því.  Nokkrir eru atvinnulausir og sjá þarna tækifæri á sæmilega launaðri vinnu. Það er ósköp mannlegt í sjálfu sér. Það er auðvitað nauðsynlegt lýðræðinu að fólk kynni sig. En sjálfhælnin er ákaflega leiðinleg. Einkum og sérílagi hjá þeim sem berir eru að verkum sem komið hafa þjóðinni á vonavöl.  Ég vona að úrslit kosninganna verði góð og allir kjósi rétt.

Allaballi?

Er þetta allaballinn sem íhaldsmennirnir sögðu að yrði eftirmaður Davíðs?

Nýr seðlabankastjóri settur

Gleðifregn.

Þetta er sérlega ánægjuleg frétt. Ég spái að þessi náungi eigi eftir að setja heimsmet í hástökki. Það var ótrúlegt myndbandið af honum sem sýnt var í vetur. Gott að það skuli runnið af kauða. Það er svo með áfengið og íþróttirnar að það á illa saman. Ég óska þessum unga manni til hamingju með þetta frábæra stökk.

Ukhov yfir 2,40 í hástökki

Rannsókn strax.

Það er óskemmtilegt að fylgjast með hverri frásögninni á fætur annari um einkennilegt ástand í Fsu. Ég kenndi í þessum skóla fyrir tveimur áratugum og finnst vænt um hann. Ég skora á Katrínu menntamálaráðherra að setja strax í fluggírinn og gera það sem gera þarf. Unga fólkið sem lendir í þessum hremmingum þarf sumt að burðast með þjáningar sínar árum saman. Þennan ljóta svarta blett þarf að afmá með öllum tiltækum ráðum. Katrín er rétt kona á réttum stað. Koma svo Katrín. 

Keyrði 70 km í FB frekar en halda áfram námi í FSu

Firra.

Þessi eftirlitsnefnd er algjörlega gagnslaus og gjaldið til að standa undir störfum hennar eru hreinir blóðpeningar. Það  þarf að breyta lögunum strax og leggja nefndina niður. Láta félag fasteignasala annast eftirlitið. Þannig hefur þetta verið hjá Lögmannafélagi Íslands og árangurinn mjög góður og kostnaðurinn aðeins 25% af því sem leiðir af eftirlitsnefndinni. Kannski er þetta gott dæmi um fljótaskriftina sem allt of oft viðgengst við lagasetninguna á Alþingi. Því miður ráða blækurnar í ráðuneytunum nú miklu meira en þingið.

Íhuga tímabundið afnám eftirlitsgjalds

Ljótt ef satt er.

Þetta eru vondar fréttir. Það er engin ástæða til að draga sannleiksgildið í efa. Ég skora á skólayfirvöld að taka sig rækilega á. Það er slæmt ef þessi ágæti bær er að verða þekktur að endemum. Leggjumst öll á eitt og lögum þetta ástand.

Einelti látið viðgangast á Selfossi?

Þrátefli.

Af hverju má ekki láta þjóðina ákveða í atkvæðagreiðslu hvort sækja eigi um aðild eða ekki? Verði það samþykkt sækjum við um en verði það fellt er umsókn blásin úr af borðinu.

Evrópustefna VG skýr

Til hvers?

Af hverju eru þingmenn sífellt að tönnlast á ESB. Þessi stjórn fór af stað án þess að hafa ESB á dagskrá enda miklu brýnni verkefni fyrir hendi. Það eru bara rúmir 2 mánuðir í kosningar og þá fáum við nýtt þing með nýtt umboð frá þjóðinni. Þá er full ástæða til að ræða málið. Besta lausnin er að lofa þjóðinni að kjósa um hvort við eigum að sækja um aðild eða ekki. Það er vitað að við skiptumst í 2 fylkingar. Hvað er lýðræðislegra en við fáum að kveða upp dóm í þjóðaratkvæðagreiðslu?

Hart deilt á stjórnarandstöðu

Sterk kona.

Það var gott að heyra að þessi skelegga Selfossdóttir ætli sér í landsmálapólitíkina. Það væru flott skipti á henni og Kolbrúnu. Vona samt að Katrín verði áfram þingmaður.

Svandís stefnir á 1. sætið í Reykjavík