Einmitt það já.

Ætlar úlfurinn í nýja sauðargæru til að losa sig við fnykinn af þeirri gömlu. Á ekki ríkið þennan banka núna? Hvernig væri að moka flórinn þarna almennilega áður en lengra er haldið? Sirkusinn heldur áfram en við skulum ekki gleyma neinu.

Nýtt nafn á Kaupþing?

Traust.

Þetta er nú flott. Útrásarvíkingarnir lýsa líka fullu trausti á sjálfa sig. Ég lýsi líka algjöru trausti á mig og mér verða bara aldrei á nein mistök.

Barnaverndarnefnd lýsir trausti á Barnavernd

Græðgi.

Ekkert hefur breyst í hugsunarhætti sumra manna eftir hrun efnahagslífsins. Hvernig má það vera að Yngvi Örn Kristinsson skuli enn vera að störfum " í þágu þjóðarinnar"? Eru engin takmörk fyrir því hvað við látum bjóða okkur? Þetta skelfingarlið er enn á fullu út um allt. Í bönkunum, stjórnsýslunni, á þingi og yfirleitt allsstaðar þar sem lykt er af peningum. Ef ekkert breytist ekki seinna en strax. skulum við taka til okkar eigin ráða. Gera ærlega hreingerningu svo eftir verði tekið.

Ný styrjöld?

Kannski ætti ég ekki að skipta mér af því sem mér ætti ekki að koma við. Ég bý á Selfossi. Ég var fermdur í kirkjunni sem stendur á bökkum Ölfusár. Finnst vænt um þessa kirkju og kem þar stundum þó ég sé ekki meðlimur í þjóðkirkjunni. Ég hef heldur ekki orðið var við að ég sé óvelkominn þar. Nú er þessu leiðindastríði í kringum síðasta sóknarprest lokið. Við skulum allavega vona það. Það væri slæmt ef ný styrjöld færi af stað í kjölfar allra leiðindanna sem afstaðin eru. Ég hef kynnst séra Kristni svolítið þau ár sem hann hefur búið hér og verið prestur í Hraungerðisprestakalli. Þau kynni eru mjög góð. Hann er heldur ekki ókunnur störfum í Selfosskirkju og myndi sóma sér vel sem sóknarprestur þar. En sitt sýnist hverjum. Vonandi tekst að ná góðri niðurstöðu í þessum efnum. En við þurfum síst í nýrri orustu að halda.

Yfirklór.

Þessi yfirlýsing er fremur aumlegt yfirklór. Kannski ekki furða að nefndin harmi umfjöllun um ólögmætar aðgerðir sínar. Forræðismálið vegna þessa unga drengs var í ákveðnu ferli og næsta skref í því átti ekki að verða fyrr en í janúar á næsta ári. Það var gott að lögmaður móðurinnar og ömmurnnar skyldi upplýsa okkur um sannleikann í þessu máli. Það virðist hafa riðið baggamuninn um að nefndin hefur nú dregið hina gerræðislegu ákvörðun sína til baka. Þetta er sagan endalausa í barnaverndarmálum á þessu landi. Hið ríkjandi ástand hefur ekkert breyst. Hroki barnaverndaryfirvalda hinn sami. Við ein vitum og þið skuluð ekki skipta ykkur af því hvað við ákveðum. Það er gömul saga og ný að sumt fólk ofmetnast af valdi sínu og telur sig geta farið með það að vild sinni. Því miður eru dæmin um þetta mýmörg. Ranglætið tekið fram yfir réttlætið í krafti hroka og fullvissu fólks um eigið ágæti og óskeikulleika. Við skulum standa vörð um réttlætið og ég vona sannarlega að niðurstaðan í máli þessa drengs verði réttlát og farsæl og að hann verði ekki frekara fórnarlamb misviturra embættismanna, sem í krafti fullvissu um eigið ágæti gera það sem þeim sýnist hverju sinni.

Harmar umfjöllun

Heiðarleg útrás.

Þetta er fagnaðarefni. Loksins verður heiðarleikinn með í för í útrás íslendinga.

Rithöfundar fylkja liði til Kaupinhafnar

Sama heygarðshornið.

Ríkisstjórn hinna vinnandi stétta er við sama heygarðshornið. Hugmyndafátæktin algjör.Hækkun virðisaukaskatts bitnar verst á þeim sem minnst bera úr býtum eins og allir aðrir neysluskattar. Auka verðbólguna og hækka öll lán. Það miðar heldur ekkert í að koma lögum yfir glæpamennina sem eiga meginsök á því hvernig komið er. Enginn áhugi virðist vera á að reyna að endurheimta neitt af ránsfeng glæpalýðsins. Það á bara að þrautpína þá verst settu, börn þeirra og barnabörn. Ég lýsi hér með frati á þessa voluðu stjórn.

Verðlagið upp um 1%

Sjálfbirgingsháttur.

Mér verður stundum um og ó þegar ég fylgist með yfirlýsingum Braga Guðbrandssonar, forstöðumanns barnaverndarstofu. Vantraust  hans á héraðsdómurum lýsir sjálfbirgingshætti af verstu sort. Ég hef oftar en einu sem lögmaður verið viðstaddur yfirheyrslur yfir börnum í barnahúsi.Orðið vitni að yfirlýsingum starfsfólks þar um menntun sína og yfirburðaþekkingu og hæfni til þess að yfirheyra börn. Jafnframt hef ég orðið vitni að svo leiðandi spurningum að ég ætlaði ekki að trúa mínum eigin eyrum. Spurningum, sem engum héraðsdómara hefði til hugar komið að leggja fyrir börn.  Það er gífurlega mikilvægt að faglega sé staðið að yfirheyrslum yfir börnum. Það má ekki undir neinum kringumstæðum leiða þau á villigötur. Það má heldur aldrei gerast að yfirheyrandinn sé búinn að komast að niðurstöðu um sekt eða sýknu áður en yfirheyrslur hefjast. Ég ætla alls ekki að gera lítið úr starfsemi barnahúss. En það er bara enginn óskeikull eins og halda mætti af yfirlýsingum Braga Guðbrandssonar.

Beðið um að kunnáttumaður komi í Héraðsdóminn

Verklagsreglur.

Eru stjórnendur Haga nauðsynlegir til að reka þetta einokunarfyritæki áfram? Eru þeir traustsins verðir? Hefur Jón Ásgeir Jóhannesson sannað það með hegðun sinni undanfarin ár að hann sé góður stjórnandi?  Ef ein króna af skuldunum verður afskrifuð verður að tryggja að þessi maður komi ekki nálægt fyrirtækinu framar. Kaupþing er nú ríkisbanki. Eign okkar allra. Það á að yfirtaka Haga strax, tryggja aðkomu góðra stjórnenda og setja Jón Ásgeir út í kuldann. Þessi hnípna þjóð í vanda hefur ekki alveg tapað réttlætiskenndinni. Við erum orðin langþreytt eftir ærlegri hreinsun í bankakerfinu. Við viljum ekki að gamla bankaliðið sem öllu kom í kaldakol fái áfram að véla um um það sem eftir er af bönkunum. Það er eins og ekkert hafi breyst með tilkomu nýrrar ríkisstjórnar. Gamli glæpalýðurinn er enn með krumlur sínar í bankakerfinu. Um daginn var ég sektaður fyrir að aka á 96 km hraða. Þar var ekkert verið að bíða með refsinguna. Sama gilti um manninn sem stal einu hangikjötslæri. Hann var arresteraður áður en honum tókst svo mikð sem að smakka á lærinu. En milljarðaþjófarnir eru ósnertanlegir. Það er hið nýja réttlæti ríkisstjórnar hinna vinnandi stétta.

Tugmilljarða afskriftir?

Sóun.

Það er löngu vitað að árlega hendum við miklum verðmætum í sjóinn. Þetta er ein af afleiðingum kvótakerfisins. Við verðum vissulega að hafa stjórn á veiðum okkar. En ef minnst er á breytingar á kvótakerfinu, upphefst mikill harmagrátur hjá fólkinu sem telur sig eiga allan fiskinn í sjónum sem þó er, lögum samkvæmt, eign okkar allra. Mörg hundruð milljarðar króna hafa horfið út úr íslenskum sjávarútvegi síðan þessu kerfi var komið á fót. Peningar sem liggja nú í sumarhöllum, snekkjum, þyrlum, Range Róverum og öðrum munaði. Það er auðvitað fráleitt að fámennur hópur manna skuli geta ráðskast með allan fiskinn sem syndir í sjónum kringum landið og telji það ofureðlilegt.Kastar honum fyrir borð þegar kerfið krefst þess.Fiskurinn og sauðkindin hafa haldið líftórunni í þegnum landsins frá því það byggðist. Forréttindastéttin virðist vera að fara á límingunum yfir fyrirætlunum um að þjóðin endurheimti eigur sínar. Kvótakerfið er versta ranglætið í þessu þjóðfélagi og er þó af nógu að taka. Gott dæmi um þann rétt sem hinir stóru, fáu útvöldu, telja sig hafa til að troða á hinum mörgu, smáu og réttlausu. Núverandi ríkisstjórn telur sig vera vinstri velferðarstjórn. Það er þó fátt sem bendir til þess nú um stundir. Því miður er þó kannski ekki um annað skárra að ræða. Ef hún stígur fyrstu skrefin til leiðréttingar á ranglæti kvótakerfisins fær hún þó nokkur prik.

Fiski fyrir hundruð milljóna króna hent í sjóinn í fyrra?