Skerðing lífeyris.

Núna á mars sótti ég um lífeyri frá Gildi-lífeyrissjóði. Ég átti nokkrar krónur þar frá árinu 1971. Þeim hefur líklega orðið svo mikið um að ég fékk bréf í gær um að þeir hefðu á fundi þann 21. apríl ákveðið að skerða lífeyri minn og annara sjóðsfélaga um 10%. Kannski verða forstjórarnir á sínum háu launum búnir með alla aurana þegar ég verð löggilt gamalmenni eftir tæp 2 ár.

Stafir ákveða að skerða réttindi lífeyrisþega um 6%

Friðrof.

Ef þetta gengur eftir er ríkisstjórnin búin að vera. ÉG. ÉG. ÉG. ÉG met það svo. ÉG tel að aðildarumsókn... Ekki meir, ekki meir heilög Jóhanna. Láttu af hrokanum og lofaðu þjóðinni að segja raunverulegt álit sitt.

„Þjóðin viti hvað er í boði“

Hver ræður?

Stýrivextir voru lækkaðir úr 15,5% í 13% nú í maí. Þá var því lýst yfir að veruleg lækkun yrði aftur í júní. Ætlar norski fjallamaðurinn að standa við það eða á senditíkin frá AGS að ráða? Hvað er þessi senditík annars að gera hér?  Til hvers höfum við ríkisstjórn og Seðlabanka? Það eru margir sem eru með langan skuldahala á yfirdráttarreikningum. Það hjálpar mikið ef vextir af þeim lækka.Sama gildir um bílalán í íslenskum krónum sem flest bera hlaupandi vexti. Það verður prófsteinn á þor og getu íslendinga hvort vextir lækka áfram eða hvort við lyppumst niður fyrir áranum frá AGS.

Sitjum ekki undir tilskipunum

Siðrænir humanistar.

Ég skil vel að einhverjir þingmenn nenni ekki að sitja undir  prestavoli í dómkirkjunni fyrir þingsetningu. En það væri örugglega farið úr öskunni í eldinn að sitja á hótel Borg í staðinn. Hinir sjálfskipuðu siðapostular í félaginu Siðmennt eru hálfu verri en prestarnir. Nafnið á félaginu er hrokafullt eitt og sér. Þeir virðast telja sig umkomna að kenna okkur hinum góða siði. Hafa einkarétt á siðferðinu. Í gamla daga sátu kommarnir í kringlunni í þinghúsinu á meðan guðsorðið var framið í dómkirkjunni. Tefldu og sötruðu kaffi. Er ekki taflborðið til enn?

Alþingi sett á morgun

Pukur.

Hvar er gegnsæið sem þessi stjórn lofaði? Allt upp á borðið sagði Jóhanna. En þegar mál þolir ekki dagsljósið eru viðhöfð nákvæmlega sömu vinnubrögðin og áður. Plottað og rottað með stórmál eins aðildarviðræður við ESB. Það er líka afar sérkennilegt við vinnubrögðin að nánast allt situr á hakanum vegna þráhyggju SF í þessu máli. Þó sumir vinstrimenn fagni því að SF og VG  hafi náð saman um stjórnarmyndun þá er ég ekki einn þeirra. SF hefur ávallt verið hugsjónalítill hentistefnuflokkur. Fá að vera við kjötkatlana og veiða uppúr bestu bitana handa gæðingum sínum. Hugsjónin helst að koma okkur í ESB og markaðsvæða heilbirgðiskerfið. Ég treysti Sigmundi Davíð og Bjarna Benediktssyni betur en Össuri og Jóhönnu. Það á að skilja SF eftir úti í kuldanum með þráhyggju sína. Gera forystumönnum flokksins ljóst að ekki verði verslað með ESB málið.

„Kanna hvort einhverjir fletir séu til samstöðu"

Kvótinn.

Kvótakerfið er einn svartasti blettur í allri sjórnmálasögu Íslands. Það er ekki skrýtið að það fari um gjafþegana þegar uppi eru áform um endurskoðun kerfisins. Þau eru þó löngu tímabær. Hins vegar verður aldrei hægt að bæta skaðann sem kerfið hefur valdið. Það verður aldrei hægt að endurheimta allt féð sem gjafþegarnir hafa dregið út úr atvinnugreininni. Peninga sem liggja í ýmsu sem kemur sjávarútvegi ekkert við. Eitt lítið dæmi. Flott sumarhöll í Grímsnesinu. Þar er hitastiginu stjórnað með fjarstýringu úr lúxusvillu í BNA. Eigandi beggja hallanna seldi brot af kvótanum "sínum" og notaði féð til fasteignakaupa. Lúxuseigna til að leika sér í.  Þetta er réttlæti kerfisins í hnotskurn.

Mun setja bankana aftur í þrot

Ríkisforstjórar.

Laun forstjóra ríkisstofnana eru í flestum tilfellum allt of há. Þessi ágæti maður, sem telur eðlilegt að hæstlaunuðustu forstjórarnir séu með sömu laun og forsætisráðherra, er sjálfur  forstjóri í stofnun sem ætti að vera búið að leggja niður fyrir löngu, FMR. Þá telur hann eðlilegt að fríðindi og bitlingar fylgi með. Það væri frekar eðlilegt að enginn forstjóri hefði hærri laun en óbreyttur alþingismaður. Við getum lagt margar þessar stofnanir niður. Þær eru arfur fortíðarinnar. Ég nefni bæði FMR og Umferðarstofu sem dæmi. Skoðunarstofurnar gætu alfarið séð um verkefni Umferðarstofu og FMR gæti bara verið deild í Landsbankanum. Þetta er auðvelt og myndi spara heilmikið. Valdhrokinn svífur enn yfir vötnunum í mörgum þessum stofnunum. Þar deila menn og drottna. Og að auki eru kjaftatíkurnar á Umferðarstofu hreint tilræði við geðheilsu þjóðarinnar. Gerum átak og hreinsum ærlega til.

Eðlilegt að miða við laun forsætisráðherra

Glæpakvendi?

Hversvegna þarf að reka þessa konu úr landi? Hvað koma lagaheimildir því við þó íbúar Seyðisfjarðar vilji hafa þessa konu hjá sér áfram? Ekkert virðist benda til annars en að hún sé góður þegn hér og því á að veita henni landvistar- og atvinnuleyfi áfram. Og ekki seinna en strax í dag.

Engin lög um dvalarleyfi á grundvelli undirskrifta

Hættuleg sýking.

Þessi maður á að skammast sín og segja af sér. Ef hann fæst ekki til þess á að reka hann. Hans persónulegu skoðanir á evrópusambandinu á hann að hafa fyrir sig. Hann er illa sýktur af ESB veirunni eins og flestir aðrir í samfylkingunni. Veiru sem er miklu hættulegri en Mexícó veiran sem er nýkomin fram.

Nýjan sáttmála um stöðugleika

Viðkvæmt mál.

Það þekkja flestir þetta mál. Það var ekki farið mjúkum höndum um séra Gunnar þegar það kom upp. Hann hefur nú verið sýknaður í Hæstarétti. En málið er þannig vaxið vegna eðlis þess að langfarsælast væri fyrir hann að hætta störfum hér á Selfossi. Hann hefur ekki lengur traust safnaðarins óskipt. Biskupinn þarf að ganga í málið og leysa það á farsælan hátt. Ég hef góð kynni við séra Gunnar og óska honum velfarnaðar. Sá velfarnaður er best tryggður með því að hann hverfi frá störfum hér í sókninni.

Prestastefna ályktar um Selfoss